Protestë artistike kundër regjimit të vizave për Kosovën

"Para punimeve të artistëve që nuk arritëm t`i kemi këtu me viza udhëtimi, do të ketë mbishkrime të vendosura në dysheme me mbishkrimin “I´m still not Europian“ (unë akoma nuk jam evropian) në shenjë protestë për mos lejimin e udhëtimit të lirë të qytetarëve dhe në këtë rast të disa pjesëmarrësve të ekspozitës"

Artisti shqiptar Mentor Ejupi – Toro jeton prej shumë vitesh në Hamburg, Gjermani, ku ka bërë emër si artist dhe së fundi edhe si galerist, duke qenë se ai ka themeluar galerinë “Mytoro” në këtë qytet.

Galeria Mytoro në Hamburg hap sezonin vjeshtor të vitit 2016 me një ekspozitë të fotografisë artistike me autorë shqiptarë. Titulli i ekspozitës është një vazhdimësi e ciklit të filluar në vitin 2013 me titull „the beautifull travellers“ që kishte nisur me artistët: Alban Muja, Nora Lumi dhe Driton Hajredini dhe duke vazhduar edicionin e radhës me Arbnore Lumi (Kanada), Arton Humolli (Kosovë), Burim Myftiu (SHBA), Dash Izairi (Gjermani), Flutra  Aliu (Lugina e Preshevës), Shkurta Bogujevci ( Kosovë) dhe Xheni Cuni ( Gjermani ), bën të ditru Toro në një njoftim për albinfo.ch
Galeria është e nderuar me prezantimin e këtyre artistëve në këtë formë dhe në këtë përmbajtje duke pasur kështu një zgjedhje të bollshme të veprave të krijuara kohën e fundit nga artistët. Përzgjedhja ishte mjaft e vështirë duke pasur parasysh kualitetin dhe vëllimin e punëve artistike. Për këtë arsye u përzgjodhën nga secili artist tri punime të cilat do të shtypen në pllaka alumini në formate të njëjta. Kolozioni i veprave në këtë ekspozitë është i bazuar në konceptin e TBT – së („the beautifull travellers“), duke quajtur kështu krijuesit shqiptarë si udhëtarë të bukur dhe si udhëtarë të të bukurës, që në fakt është një përgjigje ndaj fushatave  antishqiptare të viteve të nëntëdhjeta dhe fillimi i viteve 2000 që  propagandoheshin në mediat e ndryshme evropiane.

Mbase duke parë ngjarjet e viteve të fundit dhe duke përcjellë depërtimin e krijuesve me prejardhje shqiptare nëpër botë, qofshin në shkencë, sport, muzikë apo art, fushatat e lartpërmendura do të harrohen shpejt, por nga ana tjetër duke vërejtur politikat evropiane rrezikojmë të përfundojmë prapë në një terr  apo në një Gheto të lëvizjes së lirë. Edhe pse galeria nuk ka ambicie politike na është dukur e arsyeshme që me anë të kësaj ekspozite të sensibilizojmë publikun evropian me dëmet që po i bëhen lëvizjeve të lira të evropianëve më të rinj. Kështu para punimeve të artistëve që nuk arritëm t`i kemi këtu me viza udhëtimi, do të ketë mbishkrime të vendosura në dysheme me mbishkrimin “I´m still not Europian“ (unë akoma nuk jam evropian) në shenjë protestë për mos lejimin e udhëtimit të lirë të qytetarëve  dhe në këtë rast të disa pjesëmarrësve të ekspozitës, thuhet në fund të njoftimit.

Ekspozita hapet më 7 tetor dhe qëndron e hapur deri më 26 nëntor