Prishtina përgënjeshtron Beogradin për njohjet

Beogradi ka kontestuar njohjet e Kosovës nga Guinea- Bisau dhe Sulltanati i Omanit

Ministria e Punëve të Jashtme e Republikës së Kosovës sqaron opinionin rreth propagandës së fundit të plasuar në medie nga Beogradi për çështjen e njohjeve të Kosovës nga Guinea- Bisau dhe Sulltanati i Omanit

Në njoftimin e ministrisë thuhet se Kosova më 30 janar 2011 ka marrë notë verbale nga Sulltanati i Omanit të nënshkruar nga lartmadhëria e Tij, Sulltani Qaboos Bin Said, dërguar ish-presidentit Fatmir Sejdiu, ku thuhet se: “Njohim pozitën e Gjykatës Ndërkombëtare të Drejtësisë drejt pavarësisë së Kosovës dhe Qeveria e Sulltanatit të Omanit e mirëpret anëtarësimin e Kosovës në OKB dhe organizatat e tjera, ku Kosova dëshiron të marrë pjesë”.

 Ministria po ashtu njofton se zv. kryeministri Behgjet Pacolli ka marrë notën verbale më 10 janar 2011, në të cilën thuhet: “Autoritetet e Republikës së Guinea- Bisau kanë njohur pavarësinë dhe sovranitetin e Republikës së Kosovës”. 

Ministria e Jashtme konsideron se të pavërtetat e prezantuara nga qeveria e Beogradit janë tentativë mediale për ta shpërqendruar vëmendjen nga kërkesat reale për njohje të kufijve të Kosovës nga ana e Serbisë.