Po shtohen shqiptarët në Maqedoni

2010: Numri i maqedonasve është zvogëluar për 1.763 qytetarë, ndërsa ai i shqiptarëve është shtuar për 4.127 persona

Masat stimuluese të qeverisë së Nikola Gruevskit për rritjen e natalitetit te popullata maqedonase nuk i kanë dhënë rezultatet që priteshin, njoftojnë mediet në Shkup.

Sipas të dhënave të Entit Shtetëror të Statistikës në Maqedoni, gjatë vitit 2010 kanë lindur 12.535 fëmijë maqedonas, ndërsa kanë vdekur 14.298 persona të kësaj përkatësie etnike.

Të njëjtin vit kanë lindur 7.200 fëmijë shqiptarë dhe vdekshmëria  arriti numrin e 3.073 personave.

Sipas këtyre të dhënave statistikore del se numri i maqedonasve etnikë është zvogëluar për 1.763 qytetarë, ndërsa ai i shqiptarëve është shtuar me 4.127 persona.

Disa vjet më parë qeveria në Shkup solli një ligj për stimulimin e lindshmërisë që i irritoi shqiptarët, ngaqë ai përfshinte kryesisht komunat maqedonase. Sipas këtij ligji, nënave maqedonase që do lindin dy ose më tepër fëmijë u ofroheshin përfitime të mëdha e të përjetshme materiale.