Në rënie numri i azilkërkuesve nga Maqedonia

Zvogëlohet numri i qytetarëve të Maqedonisë që kërkojnë statusin e azilit në vendet e Bashkimit Evropian (BE)

Ministria e Punëve të Brendshme e Maqedonisë (MPB), vlerëson se numri i azilkërkuesve të ashtuquajtur të rrejshëm në vendet e BE-së ka shënuar rënie.

Megjithatë, autoritetet maqedonase nuk do të tërhiqen nga masat në drejtim të parandalimit të kësaj dukurie, që rriti shqetësimet e vendeve evroperëndimore.

“Ne do të vazhdojmë masat preventive për të parandaluar flukset e qytetarëve që ikin drejt BE-së për të kërkuar statusin e azilit. Qeveria përmes institucioneve përkatëse ka udhëhequr fushatë intensive në terren për të informuar qytetarët, sidomos të komunitetit rom, për çështjen e liberalizimit të vizave dhe dukuritë e azilkërkimit”, theksoi ministrja e MPB-së, Gordana Jankullovska, pas përfundimit të konferencës rajonale për “Dekadën e Inkluzimit të Romëve 2005- 2015 në Maqedoni”, transmeton INA.

Ndër masat e aplikuara nga ana e MPB-së ka qenë ndalesa e familjeve rome në pikat kufitare, për të parandaluar braktisjen e vendit si dhe dënime të tjera me konfiskimin e përkohshëm të dokumenteve të udhëtimit.