Mbetet tatimi për familjet që përkujdesen për fëmijët

Iniciativa e SVP-së kërkon që prindërit, të cilët kujdesen vetë për fëmijët e tyre, të gëzojnë lirim nga tatimi njësoj sikur të tjerët

Nisma e SVP-së për familjen nuk ka gjetur mbështetjen as në Dhomën e Kantoneve. Edhe kjo dhomë ka refuzuar iniciativën që ka të bëjë me kompensimin nga tatimi të familjeve me një të punësuar e që kujdesen vetë për fëmijët e tyre.

Dhoma e Kantoneve të enjten iu bashkua Parlamentit Nacional për të refuzuar iniciativën e SVP-së. Përveç SVP-së dhe CVP-së edhe FDP-ja ka treguar simpati për nismën.

Iniciativa e SVP-së kërkon që prindërit, të cilët kujdesen vetë për fëmijët e tyre, të gëzojnë lirim nga tatimi njësoj sikur prindërit të cilët paguajnë dikë që të kujdeset për fëmijët e tyre.

Shkas për iniciativën ka qenë një ligj i miratuar nga Parlamenti i Zvicrës, i cili prindërit që paguajnë dikë për t`u kujdesur për fëmijët e tyre i autorizon të tërheqin nga tatimi deri në 10 mijë franga në vit. Ky ligj, sipas SVP-së, i diskriminon prindërit që kujdesen vetë për fëmijët e tyre.