Marrëveshjet nuk cënojnë sovranitetin, thotë Lunaçek

Raportuesja për Kosovën në Parlamentin Evropian, Ulrike Lunaçek ka thënë se marrëveshjet që ka arritur Kosova me Serbinë nuk cenojnë integritetin dhe sovranitetin e Republikës së Kosovës.

Sipas saj ato janë arritur në mes të dy vendeve të pavarura, shkruajnë mediat e vendit.

Ajo është e bindur se marrëveshjet nuk prekin asnjë milimetër të sovranitetit të Republikës së Kosovës.

Sipas Lunaçek, as nxjerrja e tabelave KS për serbët nuk paraqet asnjë shkelje të sovranitetit, sepse siç arsyeton ajo, si tabelat RKS edhe ato KS do të lëshohen nga Republika e Kosovës.