Kundër revizionimit të të drejtës së shtetësisë

Po të pranohej revizionimi, shtetësinë zvicerane mund ta mirrnin vetëm të huajt me Vizën C

Komisioni Këshillëdhënës i Parlamentit Nacional kundërshton propozimin e bërë nga Qeveria Federale për revizionimin e të drejtës së shtetësisë (natyralizimit).

Propozimi i bërë nga ministrja e drejtësisë Simonetta Sommarugga, sipas përfaqësuesve të partisë Socialdemokrate dhe asaj të Gjelbër shkon tepër larg në kuptim të ashpërsimit të kushteve për fitimin e të drejtës së shtetësisë. Ndërsa për një arsye tjetër propozimin në fjalë e ka kundërshtuar Partia Popullore (SVP), e cila e konsideron atë si ndryshim tepër të vogël.

Revizioni i kontestuar i të drejtës për fitimin e shtetësisë së Zvicrës konkretisht parasheh që pasaportën zvicerane mund ta marrë vetëm ai i huaj që tashmë ka një status të përhershëm qëndrimi (Vizën C).

Po ashtu sipas ndyrshimit të propozuar parashihet që të huajt që janë integruar mirë në Zvicër të mund ta marrin shtetësinë e këtushme edhe me vetëm 8 vjet qëndrim. Që dmth. nuk do të detyrohen të presin 12 vjet, sikur pritet aktualisht.