Kroacia nuk do të kërkojë më viza për kosovarët që jetojnë në zonën Shengen

Prej 1 prilli deri në fund të këtij viti kosovarët që jetojnë në Diasporë nuk do të kenë nevojë më për viza për të hyrë në Kroaci

Lajmin e kanë konfirmuar për Albinfo.ch, zyrtarë të konsullatës kosovare në Cyrih, të cilët kanë marrë konfirmimin sot nga konsullata gjenerale e Kroacisë në Zvicër.

„Një vendim i tillë rezultoi pas një takimi të realizuar të konsullit të konsullatës së Republikës së Kosovës në Cyrih, Dhurata Selimi dhe zëvendëskonsullit Sali Sefa, në konsullatën gjenerale të shtetit kroat. Ndërsa lajmi është konfirmuar sot, se prej 1 prilli deri në fund të dhjetorit të këtij viti, të gjithë qytetarët e Kosovës, që kanë leje qëndrimi në zonën Shengen, për hyrje dhe transit nëpër Kroaci janë të liruar nga vizat”, kanë thënë zyrtarë të konsullatës së Kosovës në Cyrih.

“Ky është vendim i qeverisë kroate, kanë konfirmuar zyrtarë të konsullatës kroate”, ka thënë për Albinfo.ch, zëvendëskonsulli i Kosovës në Cyrih, Sali Sefa, duke konsideruar si shumë pozitiv këtë vendim të tyre.

Me 21 mars përfaqësues të konsullatës kroate do të takohen sërish me homologët e tyre kosovarë në Cyrih..

Ekzistenca e regjimit të vizave nga Kroacia për qytetarët e Kosovës që jetojnë në Diasporë, krijonte shumë vështirësi sidomos gjatë pushimit të verës, kur shumë bashkëatdhetarë planifikojnë pushimet në vendlindje.