I kërkojnë më të dashurit e tyre

Ata kanë qëndruar para Kuvendit të Kosovës, duke kërkuar dhe shpresuar që 2012-ta, të jetë vit kur do të merrë fund ankthi i pritjes së tyre

　

Familjarë e personave të pagjetur, edhe këtë vit e kanë përfunduar me kërkesë që të zbardhet fati i më të dashurve të tyre.

　

Ata me fotografitë në duar të më dashurve të tyre, për të cilët nuk dinë asgje tash e 12 vite, kanë qëndruar para Kuvendit të Kosovës, duke kërkuar dhe shpresuar që 2012-ta, të jetë vit kur do të merrë fund ankthi i pritjes së tyre.

　

Kryetari i Këshillit Koordinues i Asocacioneve Familjare të të Zhdukurve të Kosovës, Haki Kasumi, ka thënë me këtë rast se familjarët tash e 12 vjet po kërkojnë të zbardhet fati i personave të të pagjetur.

　

“Edhe këtë vit, përkundër kërkesave të pareshtura, të aktivistëve dhe të familjarëve, rezultatet po na mungojnë, përgjigjen jemi të detyruar ta kërkojmë prej EULEX-it. Ne jemi shumë të vendosur në kërkesat tona njerëzore dhe të drejta”, ka deklaruar Kosumaj.

　

Kryetari i Komisionit Qeveritar për Persona të Pagjetur, Prenk Gjetaj, ka thënë se këtë vit është bërë çdo gjë e mundur që të zbardhet fati i peronave të pagjetur, por instituicionet e Serbisë, të cilët kanë informacionet për të pagjeturit, nuk i hapin dosjet dhe nuk tregojnë vend-varrezat e dyshuara pa një presion të madh ndërkombëtar.

　

Ai duke theksuar se institucionet e Kosovës janë të interesuara që të zbardhin fatin e personave të pagjetur, tha se familjarët e të pagjeturve nuk kanë festë dhe as gëzim.

　

Ende nuk dihet për fatin e 1 mijë e 797 personave, të cilët janë marrë si robë lufte nga policia dhe ushtria serbe. Kurse, Serbia ende nuk ka treguar seriozitet se është i gatshëm të tregojë për fatin e të pagjeturve.

---