Gadafit dhe klanit të tij u ndalohet hyrja në Zvicër

Zvicra ka vënë sot në fuqi vendimin për ndalimin e hyrjes në këtë vend të klanit të Ghadhafit

Për 16 pjesëtarë të familjes së Gadafit, tash e tutje do të jetë e pamundur të hyjnë në vendet e BE-së dhe në Zvicër. Autoritetet e këtyre shteteve, në mesin e sanksioneve që OKB ka ngritur kundër Libisë, kanë vendosur edhe ndalimin për t`u dhënë viza hyrjeje këtyre personave në vendet përkatëse.

Zvicra ka vënë sot në fuqi vendimin për ndalimin e hyrjes në këtë vend të klanit të Ghadhafit. Këtë lajm e ka bërë të njohur zëdhënësi i Qeverisë Federale dhe vicekancelari, Andre Simonazzi për gazetën “Sonntags Zeitung”.

“Ndalimi i hyrjes për ta është ne fuqi prej disa ditësh”, ka thënë Simonazzi. Ndërsa qeveria, edhe formalisht e ka shqiptuar këtë ndalesë të premten, ditën kur vendosi që t`i zbatojë sanksionet e OKB-së kundër Libisë.

Përveç anëtarëve të familjes së Gadafit, të prekur nga ndalesa janë edhe bashkëpunëtorë të tij, punëtorë të sigurimit etj.

Ndryshe, klani i diktatorit libian, Moammar al-Gadafi, është i përçarë sa i përket ndarjes së pasurisë marramendëse që thuhet të ketë grumbulluar kreu i shtetit libian.