Dick Marty zbut raportin

Raportuesi i Këshillit të Evropës, Dick Marty, e ka zbutur raportin e tij dhe ka përpiluar një rezolutë  në tri faqe tekst ku preferon që EULEX-it të fillojë hetimet rreth “aktiviteteve kriminale të UCK-së kundër popullatës serbe dhe joshqiptare në Kosovë.

Sipas gazetës Blic të Beogradit, në rezolutë, siç pohoi edhe vetë Marty në një intervistë për albinfo,ch, nuk përmendet në mënyrë eksplicite emri i Hashim Thaçit, por theksohet se pjesëtarë të UCK-së kanë marrë pjesë në aktivitete kriminale edhe në territorin e Shqipërisë, ku thuhet se ka pasur burgje për transplantim të organeve.

Pjesë përbërëse e rezolutës është edhe memorandum, që faktikisht paraqet citim fjalë për fjalë të raportit të Martyt të publikuar nga Këshilli i Evropës një muaj më parë.

Ndërkohë zyrtarë të EULEX-it kanë thënë se do të ngrenë hetime nëse ka dëshmi të mjaftueshme se ka pasur aktivitete të rënda kriminale dhe nëse misioni evropian në Kosovës është kompetencë për këso hetimi.

Ditë më parë, një delegacion i Prokurorisë Speciale të Kosovës, i përbërë nga prokurorë të EULEX-it dhe prokurorë të Kosovës, kanë biseduar në Tiranë me kryeprokuroren e Shqipërisë, Ina Rama rreth mundësive të bashkëpunimit pas akuzave të Dick Martyt.