Bie numri i të papunëve

Numri i të papunëve ka shënuar rënie gjatë muajit mars në Zvicër. Shifrat flasin për një rënie nga 3.4% në 3.2%.

Ilustrim

Tregun zviceran i punës ka treguar rezultate pozitive gjatë muajit mars. Numri i të papunëve të regjistruar është zvogëluar për 7000 persona. Në fund të muajit, gati 139 mijë të papunë ishin të regjistruar në qendrat rajonale të punësimit (RAV).Shkalla e papunësisë është ulur në këtë mënyrë, sipas Sekretariatit të Shtetit për Çështje Ekonomike (SECO) nga 3.4% në 3.2%.

Sipas SECO-s, arsyet për këtë zhvillim pozitiv në tregun e punës janë vetëm sezonale. Në industrinë e ndërtimit janë punësuar më shumë njerëz (2350) me përfundimin e sezonit të dimrit. Gjithashtu në industrinë e hotelerisë, numri i të papunëve ka rënë për 800 persona. Shkalla e papunësisë nga ndikimet sezonale sipas llogaritjeve të SECO ka tendencë të jetë pak më e lartë se muajin e kaluar.

Në përgjithësi gjendja në tregun e punës nuk është aq e mirë sa vitin e kaluar. Në mars të vitit 2012, shkalla e papunësisë ishte në vetëm 2.9%. SECO beson se gjendja nuk do të përkeqësohet në muajt e ardhshëm, por do të përmirësohet sërish në gjysmën e dytë të këtij viti.