ATK-ja e gatshme të mbledhë taksa në veri

Aktualisht ATK ka kontakte me tatimpagues edhe në pjesën veriore. Disa sish kanë marrë numrat fiskalë

Administrata Tatimore e Kosovës ka bërë të gjitha përgatitjet e nevojshme për mbledhjen e tatimeve edhe në komunat veriore të Kosovës.

Drejtori i këtij institucioni, Behxhet Haliti ka thënë se kanë hartuar një plan konkret për t’iu qasur tatimpaguesve të komunitetit serb. Kurse njohësit e çështjeve ekonomike thonë se kjo do të jetë mjaft sfiduese, raporton RTK.　

Edhe pse për më shumë se një dekadë ATK-ja nuk ka mbledhur tatimet në veri të vendit, tash është e gatshme për një gjë të tillë.　

Drejtori i kësaj administrate, Behxhet Haliti, ka theksuar se nëse krijohen rrethana të përshtatshme, atëherë ATK-ja do të mund të bënte mbledhjen e tatimeve edhe në atë pjesë.　

Sipas tij aktualisht kanë kontakte me tatimpagues edhe në pjesën veriore dhe se disa sish kanë marrë numrat fiskalë dhe kanë filluar të instalojnë pajisjet elektronike fiskale.