Arrestohet një pjesëtar i “Çakalleve” për masakrën në Qyshk

Organet policore të Malit të Zi e kanë arrestuar mbrëmë Ranko Momiqin, që dyshohet se si pjesëtar i formacionit “Çakallet” ka marr pjesë në vrasjen e 44 shqiptarëve në Qyshk të Pejës, ka njoftuar të hënën Prokuroria serbe për krime lufte.

Në akuzën kundër Toplica Miladinoviqit dhe tetë pjesëtarëve të “Çakalleve”, thuhet se Momiq në maj të vitit 1999 ka marr pjesë në vrasjen e Haki dhe Selim Gashit dhe në vrasje grupore të 11 civilëve shqiptarë, dhe si udhëheqës i grupit, ka marr pjesë në djegien e shtëpive dhe dëbimin e familjeve nga Qyshka.

“Momiq ka marr pjesë edhe në marrjen e parave, automjeteve, arit, orëve dhe gjësende të tjera dhe dëbimin e banorëve të fshatit, me qëllim të largimit në Shqipëri”, thuhet në akuzë, transmeton FoNet.

Pritet që të hënën organet malazeze Momiqin ta dorëzojnë në Serbi.

Kundër Miladinoviqit dhe tetë personave të tjerë në Beograd është duke u mbajtur procedura kryesore e gjykimit kundër krimit të luftës në Qyshk.Është ky rasti i dytë i arrestimit të një ish-pjesëtari të “Çakalleve” të Mal të Zi. Në dhjetor të vitit të kaluar në Podgoricë u arrestua Milojko Nikoliq, i cili, në bazë të një marrëveshje midis Serbisë dhe Malit të Zi, ishte ekstraduar në Beograd.