36 raste me fruth të konfirmuara në Kosovë brenda dy muajve

@Pixabay

Instituti Kombëtar i Shëndetësisë Publike të Kosovës (IKShPK) ka njoftuar se gjatë periudhës 16 prill – 15 qershor 2026 janë regjistruar gjithsej 36 raste të konfirmuara me fruth në Kosovë.

Sipas të dhënave të publikuara, numri më i madh i rasteve është raportuar në Ferizaj me 10 raste, në Prishtinë me 8 dhe në Kaçanik me 6 raste. Në Fushë Kosovë janë shënuar 3 raste, ndërsa në Lipjan, Obiliq dhe Vushtrri nga 2 raste secila. Po ashtu, nga një rast është regjistruar në Gjilan, Shtime dhe Deçan.

IKShPK u ka bërë thirrje qytetarëve që të tregojnë kujdes dhe të kërkojnë ndihmë mjekësore në rast të simptomave si temperaturë e lartë, skuqje e lëkurës, kollë, rrufë apo skuqje të syve.

Instituti thekson se fruthi është sëmundje shumë ngjitëse dhe mund të përhapet shpejt në komunitet, ndaj u bën apel prindërve që të kontrollojnë vaksinimin e fëmijëve dhe të sigurojnë imunizimin sipas kalendarit të rregullt.

Sipas IKShPK-së, vaksinimi mbetet masa më efektive për parandalimin e fruthit dhe mbrojtjen e shëndetit publik.