Amsterdami, parajsë e biçikletave

Drejtorët shkojnë në punë me biçikletë, fëmijët shkojnë në shkollë me biçikletë, amviset bëjnë pazar me biçikletë...

Sipas një studimi të realizuar në Kopenhagë nga “Copenhagenize Index” në 150 qytete të botës, Amsterdami del të jetë qyteti më i përshtatshëm për lëvizjen me biçikleta. Mesatarisht 40% e transportit është siguruar për biçikleta, 60% në zonën në qendër të qytetit.
Amsterdami, i cili ka rrugë të gjera për biçikleta, është përshkruar si “parajsa e biçikletave”.

Në këtë qytet llogaritet të jetojnë 750 mijë banorë. Në Amsterdam, pothuaj të gjithë ngasin biçikletën, ngase llogaritet të jenë 750 mijë biçikleta në përdorim.

Të marrësh një patentë në Holandë kushton gati 1000 euro. Në autoshkolla, shoferët e rinj holandezë mësohen që kur të dalin nga vetura ta hapin derën me dorën e djathtë, kjo e detyron shoferin të rrotullojë majtas shpatullat dhe kokën dhe të shohë nëse po kalon ndonjë biçikletë.
Gjithashtu, çdo fëmijë holandez duhet të kalojë një provim të sigurisë rrugore të biçikletave në shkollë.

Bashkëjetesa e formave të ndryshme të transportit është e ndërthurur me kulturën holandeze. Çiklizmi nuk shihet thjesht si mënyrë për stërvitje apo argëtim, por si formë e mirëfilltë transporti. Drejtorët shkojnë në punë me biçikletë, fëmijët shkojnë në shkollë me biçikletë, amviset bëjnë pazar me biçikletë.

Çiklistët në Amsterdam i sheh të veshur me tesha të ndryshme, që nga xhinse deri te fustanet e mbrëmjes.

Indeksi i Kopenhagës ka gjetur më tepër përparim në disa qytete franceze sa i përket biçikletave, ndërsa Londra ka rrëshqitur 20 vende më poshtë.