Detaje tjera nga sulmi në Suedi, bilanci mund të ishte edhe më tragjik

Fillimisht, autoritetet njoftuan për pesë të plagosur, por në një deklaratë disa orë pas sulmit, Policia raportoi për 10 të vdekur

Nxënësit e shkollës, ku ndodhi sulmi me armë këtë të martë në Orebro, kishin zhvilluar më herët gjatë ditës një provim kombëtar.

Mësuesja në shkollën Risbergska, Maria Pegad, ka rrëfyer për mediat vendase se në institucionin arsimor kishte shumë pak nxënës kur ndodhi sulmi, pasi shumica ishin larguar kur përfunduan testimin, shkruajnë mediat e huaja, transmeton albinfo.ch.

Dhjetë persona raportohet se kanë humbur jetën. Mes viktimave, është dhe agresori, sipas autoriteteve.

Një mësuese ka përshkruar çastet e tmerrit kur një person hapi zjarr në shkollën ku po jepte mësim, në Orebro të Suedisë.

54-vjeçarja Maria Pegado tha se një person hapi derën e klasës pas pushimit të drekës dhe duke bërtitur, tha se të gjithë duhej të dilnin jashtë.

“I nxora të gjithë 15 studentët e mi në korridor dhe filluam të vrapojmë. Pastaj dëgjova dy të shtëna, por ia dolëm. Ishim afër hyrjes së shkollës. Pashë njerëz që tërhiqeshin zvarrë të plagosur. E kuptova se ishte shumë serioze”, tha ajo përmes një telefonate për BBC.

Fillimisht, autoritetet njoftuan për pesë të plagosur, por në një deklaratë disa orë pas sulmit, Policia raportoi për 10 të vdekur. Nuk dihen motivet e ngjarjes, megjithatë nuk dyshohet për terrorizëm. Sipas policisë, autori nuk kishte precedent të mëparshëm penal.

---