Konsullata e Kosovës në Gjenevë organizon aktivitete përkujtimore për personat e zhdukur

Konsullata e Përgjithshme e Republikës së Kosovës në Gjenevë, në bashkëpunim me Jardin des Disparus, do të organizojë më 30 gusht një sërë aktivitetesh përkujtimore me rastin e Ditës Ndërkombëtare të Personave të Zhdukur me Forcë.

Programi do të nisë në orën 11:00 me hapjen e ekspozitës së artistit Artan Korenica.

Aktivitetet do të vazhdojnë në orën 18:00 me një tryezë diskutimi kushtuar çështjes së personave të zhdukur, ndërsa në orën 20:00 do të shfaqet filmi dokumentar “Ferdonija”.

Organizatorët bëjnë të ditur se aktivitetet mbështeten nga Komuniteti Shqiptar i Gjenevës, ndërsa kanë ftuar qytetarët dhe pjesëtarët e komunitetit shqiptar që të marrin pjesë në këtë ditë përkujtimore.

“Për ata që mungojnë, për të vërtetën që kërkojmë!”, është mesazhi që shoqëron aktivitetet e 30 gushtit.

Dita Ndërkombëtare e Personave të Zhdukur me Forcë shënohet çdo vit më 30 gusht, duke rikthyer vëmendjen te personat e zhdukur dhe familjet që vazhdojnë të kërkojnë përgjigje për fatin e më të dashurve të tyre.