Mal i Zi, procedohen katër persona pasi vendosën flamurin shqiptar mbi veturën e Policisë

Në mesin e të proceduarve janë edhe dy të mitur, ndërsa pamjet e ngjarjes në Tuz ishin publikuar në TikTok

Policia e Malit të Zi ka proceduar katër persona lidhur me shfaqjen e flamurit shqiptar dhe prishjen e rendit dhe qetësisë publike në Tuz, pasi njëri prej tyre kishte vendosur flamurin mbi një veturë zyrtare të Policisë.

Sipas njoftimit të Policisë së Malit të Zi, bëhet fjalë për E.K., 21 vjeç, A.S., 28 vjeç, si dhe dy të mitur të moshës 16-vjeçare, njëri prej të cilëve është shtetas i Shqipërisë, përcjell albinfo.ch.

Rasti ka ndodhur më 20 gusht në Tuz, ku personat në fjalë dyshohet se kanë shfaqur flamurin e Shqipërisë dhe simbole kombëtare në hapësirë publike. Njëri prej të miturve dyshohet se e ka vendosur flamurin shqiptar mbi kapakun e një veture zyrtare të Policisë, ndërsa pamjet më pas janë publikuar në rrjetin social TikTok.

Policia ka bërë të ditur se ndaj katër personave janë paraqitur kallëzime kundërvajtëse për shkelje të dispozitave që lidhen me përdorimin e simboleve të një shteti tjetër në vend publik, si dhe për prishje të rendit dhe qetësisë publike.

Autoritetet kanë njoftuar gjithashtu se ndaj prindit të njërit prej të miturve do të ndërmerren masa përkatëse për neglizhencë, ndërsa do të kontrollohet edhe ligjshmëria e qëndrimit në Mal të Zi e të miturit që është shtetas i Shqipërisë.

---