Kroacia në mbështetje të diasporës kosovare

Zëvendësministri kroat i Kulturës, Berisla Shupic i ofroi mbështetje Ministrisë kosovare të Diasporës për Restaurimin e Objekteve të Trashëgimisë Kulturore

Institucionet e Kosovës dhe ato të Kroacisë do të intensifikojnë bashkëpunimin në ruajtjen e trashëgimisë kulturore, gjuhës dhe identitetit kombëtar për komunitetet e të dyjave vendeve. Kështu u tha gjatë një takimi që ministri i Diasporës, Valon Murati zhvilloi me zëvendësministrin e Kulturës të Kroacisë, Berislav Shupic.

Murati gjatë vizitës në Kroaci takoi zëvendësministrin Shupiq me të cili diskutoi edhe mundësinë e inicimit të marrëveshjes së bashkëpunimit për hapjen e Qendrave Kulturore të Kosovës dhe Kroacisë në dy vendet.

Ministri Murati e njoftoi zëvendësministrin mbi objektivat e Ministrisë së Diasporës në fushën e ruajtjes dhe promovimit të kulturës në diasporë dhe integrimit të mërgatës në shtetet ku jetojnë dhe veprojnë, duke theksuar nevojën e shkëmbimit të përvojave të mira në këtë fushë që rezulton në benefit të komunitetit shqiptar që jeton në Kroaci.

Ministri Murati u njoftua nga kolegët e tij të Qeverisë së Republikës së Kroacisë për punën që po bëhet në nënshkrimin e memorandumit të bashkëpunimit mes dy vendeve në fushën e bashkëpunimit kulturor, e ku Ministria e Diasporës është e gatshme të ofrojë inputet e veta për të ndihmuar komunitetin shqiptar në Kroaci.

Gjithashtu zëvendësministri Shupic ofroi asistencën e Ministrisë së Kulturës të Kroacisë në angazhimin e Institutit për Restaurimin e Objekteve të Trashëgimisë Kulturore për ngritjen e kapaciteteve të Republikës së Kosovës në këtë fushë.