Përfundon votimi në Maqedoninë e Veriut, në orën 23:00 dalin rezultatet

(AP Photo/Boris Grdanoski)

Kanë mbaruar votimet për zgjedhjet parlamentare në Maqedoni, ku deri në orën 20:30, sipas KSHZ-së, të drejtën e votës e kanë ushtruar mbi 50.86 % të votuesve.

Zgjedhjet kanë qenë kryesisht të rregullta, me disa incidente të vogla. Këto zgjedhje u mbajtën në situatë pandemie, ku për votime janë vendosur rregulla strikte me qëllim të ruajtjes së shëndetit të qytetarëve.

Zëdhënësi i Komisionit Shtetëror për Zgjedhje, Admir Shabani, bëri të ditur se rezultatet do të publikohen dy orë pas mbylljes së vendvotimeve, pra në orën 23:00.

“Përllogaritjet tona janë se më së voni deri në ora 23:00 do të kemi një numër të konsiderueshëm të të dhënave”, tha zëdhënësi i KSHZ-së, Shabani, përcjell albinfo.ch.

Ndryshe, në këto zgjedhje të drejtë vote kishin 1.715.263 votues.

Procesi i votimit në këto zgjedhje të parakohshme parlamentare për herë të parë po zhvillohet tre ditë për shkak të pandemisë së koronavirusit të ri (COVID-19).

Në dy ditët e kaluara votuan personat e infektuar me COVID-19 dhe ato në vetizolim, si dhe personat e sëmurë dhe të pafuqishëm, personat në shtëpi pleqsh, të burgosurit dhe personat e zhvendosur në Qendrën e Personave të Zhvendosur.