Marrëveshje LDK-PDK për koalicion

Lideri i LDK-së, Isa Mustafa dhe kryetari i PDK-së, Hashim Thaçit janë pajtuar në parim për bashkëqeverisje. Takimi e ndërmjetësoi presidentja Atifete Jahjaga

Pas më shumë se pesë muaj të ngërçit politik, të mërkurën mbrëma është arritur një marrëveshje në parim për koalicionin e ardhshëm qeveritar ndërmjet Lidhjes Demokratike të Kosovës dhe Partisë Demokratike të Kosovës. Marrëveshja është arritur ndërmjet dy liderëve, Isa Mustfaës dhe Hashim Thaçit.

Këtë marrëveshje e ka konfirmuar presidentja e Republikës së Kosovës, Atifete Jahjaga, e cila bashkë me ambasadoren e Shteteve të Bashkuara të Amerikës, Tracey Ann Jacobson, i ka bashkuar dy rivalët politikë.

“Në takimin e zhvilluar në Zyrën e Presidentes, me nismën e dy liderëve, z.Thaçi dhe z.Mustafa u pajtuan në parim për ndërtimin e koalicionit ndërpartiak ndërmjet Partisë Demokratike e Kosovës dhe Lidhjes Demokratike të Kosovës për të ndërtuar institucionet e Republikës së Kosovës”, ka thënë presidentja Jahjaga në një komunikatë për media.

Të dy liderët politikë, sipas saj, theksuan përkushtimin e tyre për përmbylljen e shpejtë të procesit të ndërtimit të institucioneve në bazë të Kushtetutës, vendimeve të Gjykatës Kushtetuese dhe parimeve kushtetuese që ruajnë siç thuhet, karakterin shumetnik të Republikës së Kosovës, përmbushin obligimet ndërkombëtare të rendit dhe ligjit dhe forcimit të rrugës euroatlantike të vendit tonë.

“Presidentja Jahjaga si faktor i unitetit dhe garantuese e funksionimit demokratik të institucioneve të Kosovës do të vazhdojë të luaj rolin lehtësues në përputhje me Kushtetutën e Republikës së Kosovës në këtë proces”, thuhet në njoftim.

Nga asnjëra parti nuk jepen informata shtesë se cili nga dy liderët do ta drejtojë Qeverinë e re.