Përmbytje në Shqipëri, tre të vdekur

Përmbytjet kanë ardhur si pasojë e reshjeve të pandërprera të shiut. Sipas burimeve nga Shqipëria, dy nga viktimat janë babë e bijë. Ata humbën jetën në rajonin e Laçit

Tre persona kanë humbur jetën dhe qindra hektarë tokë janë vërshuar nga përmbytjet e fundit që ka përfshirë Qarkun e Lezhës në Shqipëri. Përmbytjet kanë ardhur si pasojë e reshjeve të pandërprera të shiut. Sipas burimeve nga Shqipëria, dy nga viktimat janë babë e bijë.   

“Fatkeqësisht, Gjon Zef Kola, 60 vjeç nga Laçi, dhe vajza e tij, 26-vjeçarja Dorina Kola, u rrëmbyen nga uji, ndërsa gjendeshin duke lëvizur me automjet në qendër të qytetit”, thuhet në njoftim.

Policia gjeti në automjet të mbytur 60-vjeçarin dhe më pas në një distancë më të madhe është gjetur në orën 1 të mëngjesit trupi i 26-vjeçares. Ndërkohë, rreth orës 23:30, në fshatin Gallatë të Kurbinit, dy të rinj, një 15-vjeçar dhe shoku i tij 21-vjeçar Liman Balloku, po udhëtonin me një motor kur janë rrëmbyer nga ujërat në rrugë.

15-vjeçari mundi të shpëtojë edhe me ndihmën e banorëve, ndërsa 21-vjeçari u gjet i vdekur pas një ore nga ana e policisë.

Menjëherë pas vërshimeve është ngritur Shtabi i Emergjencës dhe në terren janë angazhuar 300 forca policie, zjarrfikësit dhe punonjësit e bashkive.

Sipas të njëjtave burime, rrugët e rajonit të Lezhës, Laçit e Mamurrasit janë kthyer në lumenj të vërtetë, ndërkohë që dëmet materiale nëpër banesa janë shumë të mëdha.

Ndryshe, moti i keq ka përfshirë dhe Durrësin dhe disa komuna tjera të Shqipërisë. Uji ka vërshuar në rrugët e qytetit, duke shkaktuar përmbytje në disa zona, përfshi dhe periferitë. Më keq situata ishte në hyrje të qytetit, ndërsa edhe lundrimi në det është vështirësuar për shkak të erës.