Sërish për arinjtë e Kosovës, tre muaj pas aksionit të shpëtimit

Në kushte të reja, ata kanë pasur mundësi të zhvillohen normalisht, në ambientin natyror që i përshtatet llojit të tyre

Në muajin maj të këtij viti një aksion në Kosovë i shoqatës ndërkombëtare për mbrojtjen e kafshëve „Vier Pfoten“  (Katër putrat) kishte pushtuar kryetitujt e medieve në gjuhën gjermane.

15 arinj ishin nxjerrë nga „kopshtet zoologjike“ në kuadrin e restoreanteve të ndryshme kosovare ku ata, duke jetuar në kushte të mjerueshme, shërbenin si „atraksion“ për vizitorët.

Për këta arinj organizata në fjalë, në bashkëveprim me autoritetet kosovare pati ngritur një park të rrethuar natyral në malet diku në rrethinën e Prishtinës. Në kushte të reja, ata kanë pasur mundësi të zhvillohen normalisht, në ambientin natyror që i përshtatet llojit të tyre, shkruan gazeta austriake “Kleine Zeitung”.

„Synimi ynë është që arinjve tu krijojmë kushte që u ngjajnë atyre në natyrën e lirë“, ka thënë udhëheqësja e shërbimit të përkujdesjes për kafshë, Emily Lloyd.

Arinjtë, sipas „Vier Pfoten“ ishin duke u mbajtur në kafaze që ishin tepër të vegjël për madhësinë e trupit të tyre. Kjo mënyrë e jetes atyre u kishte shkaktuar çrregullime të rënda në mënyrën e sjelljes.