Universiteti Veror, i hapur edhe për studentët e diasporës

Edicioni XIII i Universitetit Veror Ndërkombëtar të Universitetit të Prishtinës do të organizohet në kampusin e Universitetit të Prishtinës prej datës 22 korrik deri më 2 gusht 2013

Gjatë kësaj periudhe dyjavore është planifikuar të mbahen 24 kurse nga fusha të ndryshme të studimit.

UVNUP-ja është e hapur për të gjithë studentët dhe stafin akademik të universiteteve, respektivisht të instituteve shkencore të të gjitha vendeve të botës, përfshirë edhe studentët e diasporës, thuhet në një njoftim të UP-së.

Në këtë edicion veror janë paraparë të pranohen rreth 350 studentë, prej të cilëve parashihen 150 ndërkombëtarë, ndër ta 75 nga Evropa Juglindore, si dhe nga vendet e rajonit, ku bëjnë pjesë: Shqipëria, Maqedonia, Bosnjë e Hercegovina, Bullgaria, Serbia, Mali i Zi, Moldavia dhe Rumania. Pjesa tjetër e studentëve pjesëmarrës janë nga Universiteti i Prishtinës, përfshirë një numër të vogël të studentëve nga institucionet e arsimit të lartë në Republikën e Kosovës.   

Të gjithë studentët inkurajohen të aplikojnë për Universitetin Veror 2013. Aplikimi mund të bëhet në mënyrë elektronike këtu ose personalisht në Zyrën e Universitetit Veror 2013, ndërtesa e Fakultetit Juridik, K/4, 10000 Prishtinë, Republika e Kosovës.

Afati i fundit për aplikim është 10 qershor 2013.

Për studentët ndërkombëtarë një nga kriteret për pranim në UVNUP do të jetë edhe njohja shumë e mirë e gjuhës angleze si dhe përshtatja e fushës së studimit me kursin e përzgjedhur.
Për studentët vendës, për shkak të numrit të madh të aplikantëve, përzgjedhja do të bëhet në bazë të notës mesatare dhe nivelit të njohjes së gjuhës angleze. Testimi i njohurive në gjuhën angleze do të bëhet nga stafi akademik i UP-së.   

Në edicionin 2013 të Universitetit Veror Ndërkombëtar do të mbahen 24 kurse/seminare në fusha të ndryshme studimi, si shkenca sociale, juridike, ekonomike, agrare, arte, mjekësi  si dhe diskutime publike/panele dhe aktivitete të ndryshme rekreative.

Certifikatat dhe ECTS kreditë

Pjesëmarrësit / studentët të cilët ndjekin të paktën 80% të klasave të tyre dhe i kalojnë provimet ose detyrat e duhura, do të fitojnë kredi ECTS nëpërmes “Certifikatës së Universitetit Veror Ndërkombëtar të Prishtinës”. Kjo certifikatë përfshin përshkrimin e kursit, ECTS kreditë dhe notat e studentit. Certifikata do të deklarojë emrin e pjesëmarrësit dhe do të nënshkruhet nga profesori vizitor i UVNUP-së dhe nga bashkëprofesori. Certifikatat janë hartuar sipas standardeve të Bolonjës.
Gjuhë e komunikimit në të gjitha kurset e Universitetit Veror Ndërkombëtar të Prishtinës do të jetë gjuha angleze.

Forumet publike/Punëtoritë
Forumet publike do të jenë pjesë përbërëse e Universitetit Veror, të cilat ngjallin debate të problemeve të ndryshme socio-ekonomike në shoqëri. Gjatë Universitetit Veror do të organizohet të paktën një forum i hapur me studentët pjesëmarrës dhe do të ftohen për debat personalitete të shquara të vendit tonë.

Aktivitetet rekreative

Në aktivitete rekreative parashihen:
•    Ekskursione në fundjavë (2)
•    Një darkë hapjeje dhe mbylljeje për stafin akademik, zyrtarët e UP-së dhe të UVNP-së
•    Një aheng hapjeje dhe mbylljeje për studentët e UVNP 2013
•    Mbrëmje studentore
•    Turnire futbolli
•    Aktivitete të tjera rekreative.

Mësimdhënësit

Numri i mësimdhënësve do t’i përshtatet numrit të kurseve/seminareve, duke i ndarë kështu për njësi kursi një mësimdhënës ndërkombëtar dhe një mësimdhënës vendës (si bashkëpunëtorë).

Për më shumë ju ftojmë të vizitoni linkun zyrtar të Universitetit Veror Ndërkombëtar të Prishtinës www.uvp.uni-pr.edu apo të kontaktoni znj. Mirjeta Ismajli në email adresën [email protected]

---