Minat vazhdojnë ta kërcënojnë Kosovën

Forca e Sigurisë së Kosovës filloi sezonin veror të çminimit. Sipas FSK-së, kanë mbetur edhe 54 fushëbeteje pa i pastruar nga minat. Deri tani 115 veta e kanë humbur jetën

Rreth 115 qytetarë të Kosovës e kanë humbur jetën nga shpërthimi i minave që janë “mbjellë” nëpër fushëbeteja nga policia, ushtria dhe forcat paraushtarake serbe, ndërsa  rreth 500 qytetarë të tjerë kanë mbetur invalidë. Sipas FSK-së, në Kosovë kanë mbetur të pa deminuara edhe 54 fushëbeteje.  

Gjeneral Kadri Kastrati është komandant i Forcës së Sigurisë së Kosovës. Ai të enjten i nisi në mision, njësitet e specializuara të FSK-së për t’i deminuar disa nga fushëbetejat e mbetura nga viti 1999.  

“Kompania e deminimit të FSK-së, për tri vite, ka pastruar mbi 706.764 metra katrorë dhe ka shkatërruar mbi 2236 mjete të pashpërthyera, ku si pasojë e minave dhe mjeteve të tjera të pashpërthyera kanë humbur jetën 115 veta dhe 454 të tjerë, kanë pësuar lëndime të rënda trupore”, tha Kastrati.

Njësitet e specializuara të deminerëve e kanë filluar të enjten sezonin e verës, për të pastruar nga minat, disa nga fushëbetejat e mbetur nga lufta. Beteja e parë e çminuesve është parku i Gërmisë ku kanë mbetur edhe disa lokacioni pa i pastruar nga minat.

Komandant Kastrati iu uroi fat dhe suksese ekipeve të deminimit, duke iu rikujtuar se ”puna e tyre është me plot rreziqe”. “Por, kjo dëshmon gatishmërinë dhe profesionalizimin tuaj, për t’i shërbyer vendit”, u tha gjatë fillimit të aksionit.

Forca e Sigurisë së Kosovës përveç parkut të Gërmisë është duke pastruar edhe në lokacione të tjera. Në Kosovë, siç tha Kastrati, kanë mbetur edhe 54 fusha të minuara, të ditura, dhe 40 fusha të tjera që dyshohet se janë të minuara.

Hendikepi më i madh i FSK-së, sipas tij, është se ushtria dhe policia serbe nuk ua ka dhënë hartat e minave, me të cilat çminimi do të ishte shume më i lehtë. “Sikur t’i kishim të siguruara hartat, që tregojnë zonat e minuara në Kosovë, punët do t’i kishim kryer me shpejt dhe pa pasoja në njerëz”, tha ai.

 Në Gërmi ka mbetur objekti i fundit i cili ka qenë i bombarduar nga forcat e NATO-s.

“Me ndihmën e Qeverisë Suedeze e cila na ka ofruar një ekskavatorë special për bluarjen e gërmadhave dhe pastrimin e minave eventuale nën gërmadha, do ta pastrojmë objektin e fundit këtu në Gërmi”, tha gjenerali i FSK-së.