Policët rrahin të huajin dhe e lënë në rrugë

Një shtetas i huaj, 37 vjeçar ka thënë se është rrahur nga dy policë dhe është lënë aty me lëndime. Hetimet kanë çuar në identifikimin e shpejtë të të dyshuarve

Prokuroria shtetërore e Tesinës ka filluar procedurën hetimore kundër dy policëve nga Luganoja, të cilët dyshohen të kenë rrahur një person me shtetësi të huaj dhe ta kenë lënë personin e lënduar në rrugë.

Rasti ka ndodhur në mbrëmjen e të mërkurës, thonë në prokurori. Policët e policisë kantonale në Arogno, një lokalitet i vogël në breg të liqenit të Luganos kanë gjetur një person të lënduar. Ky person, shtetas i huaj, 37 vjeçar ka thënë, sipas prokurorisë, se është rrahur nga dy policë dhe është lënë aty me lëndime. Hetimet e ndërmarra kanë çuar në identifikimin e shpejtë të të dyshuarve.

Kështu, kundër dy policëve nga Lugano po hetohet për veprat penale si shkaktim lëndimi trupor, mos ofrim të ndihmës, keqpërdorim të postit zyrtar dhe për privim nga liria.

Hetimet ndodhen ende në fazën e tyre fillestare, thonë në prokurori.