Restaurohen dy ikona në muzeun e Beratit

Instituti i Monumenteve të Kulturës në Shqipëri njofton se Drejtoria Rajonale e Kulturës Kombëtare në Berat po kryen ndërhyrje konservuese dhe restauruese në ikonat “Hyrja në Jeruzalem” dhe “Profeti Ilia”.

Sipas IMK-së, kujdesi, mirëmbajtja dhe promovimi i trashëgimisë sonë kulturore është një mision i përbashkët për t’i përçuar këto pasuri, në mënyrën e duhur, te brezat e ardhshëm.

“Një punë e vyer e specialistëve, e cila shmang degradimin e mëtejshëm të ikonave si dhe rikthimin e imazhit ikonografik në bukurinë fillestare”, thuhet në njoftim, përcjell albinfo.ch.

Laboratori i Restaurimit të Veprave të Artit në qytetin e Beratit ka restauruar gjithashtu ikonat “Mbledhja e Kryeengjëjve”, me autor Gjergj Johan Çetirin, si dhe ikonën me të njëjtin emër “Mbledhja e Kryeengjëjve” e Kostandin Zografit, “Ngritja e kryqit” dhe “Shën Thanasi”.

Kohët e fundit pasuritë kulturore në gjithë Shqipërinë vijojnë të vëzhgohen dhe të mirëmbahen në mënyrë sistematike nga specialistët e Drejtorive Rajonale të Trashëgimisë Kulture.