Nis procesi për regjistrimin e diasporës

Qeveria e Kosovës e ka emëruar Lulzim Dragushën kryesues të Komisionit qeveritar për hartimin regjistrin e mërgimtarëve

Qeveria e Kosovës duket se e ka marrë me seriozitet regjistrimin e kosovarëve që jetojnë dhe punojnë në diasporë. Për përgatitjen e këtij procesi, Kabineti qeveritar emëroi Lulzim Dragushën, kryesues të Komisionit të qeverisë për hartimin dhe finalizimin e Koncept Dokumentit për Regjistrin e Mërgimtarëve.

Qeveria e ka themeluar këtë komision në bazë fuqisë së saj ekzekutive dhe duke u bazuar në rregullore e saj të punës. Ky komision, siç raportoj gazeta JNK, do të organizojë regjistrimin e mërgimtarëve kosovarë.

Lulzim Dragusha mban pozitën e këshilltarit për Investime të Diasporës në kabinetin e ministrit të Diasporës Ibrahim Makolli. “Jam më i përgatituri profesionalisht në kabinet për të udhëhequr këtë komision”, ka thënë Dragusha, i cili ka konfirmuar se është edhe dhëndër i familjes së kryeministrit Hashim Thaçi.

Ky komision që do të hartojë Koncept-Dokumentin për regjistrimin e mërgatës do të ketë si zëvendëskryesues Mentor Borovcin që mban pozitën e Drejtorit të Drejtorisë Ligjore në Ministrinë e Diasporës.

Anëtarë komisioni do të jenë Isa Krasniqi, kryeshef i Agjencisë së Statistikave të Kosovës, Blerim Canaj që mban pozitën e kryeshefit të Agjencisë së Regjistrimit Civil, Besim Kajtazin drejtor i Zyrës Ligjore në Zyrën e Kryeministrit e Ruzhdi Halili, zyrtar në Zyrën e Kryeministrit.

Ndryshe edhe ministri i Diasporës, Ibrahim Makolli ka thënë për “albinfo.ch” se në vitin 2013 do të fillojnë përgatitjet për regjistrimin e mërgimtarëve. Ai tha se për këtë çështje është koordinuar edhe me dikasteret tjera qeveritare, me qëllim që ky proces të nisë dhe të përfundojë suksesshëm. Ai tha se regjistrimi i mërgimtarëve është proces kulminant.