U arrestua Enver Sekiraqa

I shumëkërkuari nga policia, Enver Sekiraqa është arrestuar në lagjen “Kodra e Trimave” në Prishtinë pa asnjë rezistencë

Njëri nga personat më të kërkuar në Kosovën e pasluftës, Enver Sekiraqa është arrestuar të premten në Prishtinë nga Policia e Kosovës dhe ajo a e EULEX-it (Misioni i BE-së për Sundimin e Ligjit në Kosovë). Ai akuzohet se ka planifikuar dhe ka ndikuar në vrasjen e policit të Njësisë Speciale (ROSU), Triumf Riza.

Sipas informacionit zyrtar që la lëshuar edhe EULEX-i, por edhe Ministria e Punëve të Brendshme e Kosovës, Sekiraqa është arrestuar në lagjen “Kodra e Trimave” pa asnjë rezistencë, “si qengji”. Mbi të dhe klani i tij, bien një varg akuzash që i kanë bërë para dhe pas luftës në Kosovë.

“Mund të konfirmojmë se sot pasdite policia e EULEX-it në, e udhëhequr nga një prokuror të EULEX-it nga Prokuroria Speciale e Kosovës, ka arrestuar Enver Sekiraqën”, ka thënë për JNK zëdhënësi i EULEX-it, Blerim Krasniqi. “Ai është vetëdorëzuar dhe do të intervistohet nga prokurori i EULEX-it i Prokurorisë Speciale”, konfirmoi Krasniqi.

Arrestimin e të shumëkërkuarit nga policia e ka konfirmuar edhe Ministri i Punëve të Brendshme, Bajram Rexhepi. Ai ka thënë për Expressse Sekiraqa është arrestuar nga Policia e Kosovës në bashkëpunim me EULEX-in. “Po është arrestuar Sekiraqa. Për detaje tjera pyeteni policinë”, ka thënë Rexhepi.

Enver Sekiraqa dyshohet se e ka planifikuar dhe ka ndikuar në vrasjen e policit të Njësisë speciale (ROSU) Triumf Riza në vitin 2007. Pas vrasjes, ai ishte arratisur në Irlandë, ndërsa institucionet e Kosovës e kishin të pamundur ekstradimin e tij, për shkak se Kosova nuk ka marrëveshje ekstradimi me Dublinin zyrtar.

Ndërkaq një vit më parë mediet raportuan se Enver Sekiraqa ishte kthyer në Kosovë dhe po qëndronte në Mitrovicën e veriut, mirëpo Policia e Kosovës e kishte të pamundur arrestimin e tij, sepse ai shoqërohej me grupet radikale serbe që kundërshtonin autoritetin e Prishtinës zyrtare në këtë rajon.

Dy javë më parë ai u pa në Prishtinë, ndërsa Policia iu vë pas. Sot pasdite (e premte) ai u arrestua në lagjen e tij.