Virusi i “Nilit”godet Kosovën, tre të vdekur

Simptomat e virusit të “Nilit”, janë po thuajse të njëjta me gripin të rëndomtë, temperatura, dhembja e kokës, lodhja, dhembje e trupit, të përzierat, vjella, herë pas herë skuqja e lëkurës etj.

Tre qytetarë të Kosovës dyshohet se kanë vdekur nga një virus i quajtur “Nil” i cili bartet nëpërmjet mushkonjave te njerëzit. Ky virus i cili, sipas infektologëve kosovarë, nuk dallohet nga gripi i zakonshëm, i godet më shumë qytetarët që janë me imunitet të dobët, ose kryesisht ata persona që kanë transplante.

Që nga identifikimi i personave me këtë lloj virusi, në Qendrën Klinike Universitare të Kosovës janë mbajtur konferenca të rregullta për t’i informuar qytetarët për mbrojtje nga virusi i “Nilit Perëndimor”. Megjithatë në Kosovë thuhet se nuk ka nevojë për panik.

“Albinfo.ch” ka kontaktuar drejtorin e Institutit të Shëndetit Publik të Kosovës, Naser Ramadani për të marrë informatat e fundit rreth zhvillimeve të këtij virusi, por mjeku tha se janë në takime intensive për këtë çështje. Megjithatë shifrat mbeten të njëjta, ato që janë dhënë më herët.

“Një pacient i hospitalizuar në Klinikën Infektive pasi që infektologët i kanë ndërmarrë të gjitha masat protokollare, pacientja fatkeqësisht ka përfunduar me vdekje në një gjendje të rënd klinike. Kur kemi gjurmuar aktivisht edhe dy raste të tjera suspekte me virusin e “Nilit perëndimor” kanë përfunduar fatalistë”, citon RTK, Naser Ramadani,

Karakteristikë e virusit të “Nilit”, siç përshkruhen janë po thuajse të njëjta me simptomat e gripit të rëndomtë. Simptomat janë temperatura, dhembja e kokës, lodhja, dhembje e trupit, të përzierat, vjella, herë pas herë skuqja e lëkurës dhe enjtja e gjëndrave limfatike.

Sëmundja, siç thuhet, mund të shfaqet tek njerëzit e secilës moshë, mirëpo njerëzit mbi moshën 50 vjeçare dhe personat me imunitet të zbehur. Periudha e inkubacionit është prej 3-14 ditë, ndërkaq pacientet që vdiqën në Kliniken Infektive janë nga Drenasi, Gjakova dhe Kaçaniku.

“Mushkonja ka gjithkund, por, fatmirësisht po e them edhe këtë që nuk përhapet prej njeriut në njeri, por, vetëm nga mushkonjat dhe çdo mushkonjë nuk e ka virusin”, ka thënë infektologu Ramadani, sipas të cilit nuk ka vend për panik.

Vetëm gjatë dekadës së fundit, Kosovën e kanë goditur disa lloj virusesh të tilla të cilat kanë marrë dhjetëra jetë njerëzish, siç ka qenë: Gripi i derrave, gripi i shpezëve, pickimi i rriqrave (virusi krime kongo), bruceloza, dhe tash Gripi i Nilit Perëndimor. Më me fatalitet ka qenë Gripi i derrave dhe pickimi i rriqrave i cili vazhdon të jetë aktiv gjatë muajve të verës.