Njeriu me “krahun e artë”, dhuron gjak për herë të fundit

Një 81-vjeçar në Australi ka dhënë gjak për herë të 1,173-të. Ai ka shpëtuar jetën e mbi 2.4 milionë foshnjave gjatë disa dekadave. James Harrison, i njohur me nofkën “njeriu me krahun e artë”, bëri dhurimin e tij të fundit të gjakut.

Ai dhuroi gjak 1,173 herë dhe shpëtoi jetën e mbi 2.4 milionë foshnjave gjatë disa dekadave. 81-vjeçari ka një antitrup në gjakun e tij, që përdoret për të bërë ilaçin jetëshpëtues Anti-D, përcjell albinfo.ch.

Sipas Kryqit të Kuq të Australisë, ilaçi Anti-D u jepet nënave, gjaku i të cilave është në rrezik të sulmojë foshnjat e palindura. Harrisoni është pionier në programin anti-D, duke dhënë gjak që nga viti 1967.

Ai madje mban edhe rekordin botëror të Guinnessit për dhurime të gjakut dhe është nderuar në Australi për shërbimin e tij. Kur Harrisoni ishte 14 vjeçar, iu nënshtrua një operacioni në gjoks dhe kishte nevojë për gjakun e të tjerëve. Ai u zotua pas procedurës që sapo të rritej do të dhuronte gjakun e tij për të tjerët.