Kosova vë kushte për veturat e vjetra

Ministri i Mjedisit, Dardan Gashi ka nxjerr një Udhëzimin Administrativ me të cilin i menaxhon automjetet e vjetra

Qeveria e Kosovës u ka vënë “sanksione” të gjitha ata qytetarë që në mënyrë jashtëligjshme kanë shitur apo blerë vetura të vjetra dhe i kanë deponuar në skaj të rrugëve. Këto “fosile” konsiderohen të rrezikshme për ambientin, prandaj ministri i Mjedisit, Dardan Gashi ka nxjerr një Udhëzimin administrativ për menaxhimin e tyre. “Ky udhëzim ka për qëllim arritjen e nivelit të lartë të ripërdorimit, riciklimit dhe formave tjera të përpunimit të automjeteve mbeturinë, krijimin e sistemit të grumbullimit, transportit dhe trajtimit, si dhe caktimin e kushteve të përshtatshme për magazinimin e tyre”, thuhet në një njoftim të MMPH-s. 

Udhëzimi, siç thuhet në njoftim, aplikohet për automjetet e çregjistruara në përputhje me rregulloret përkatëse, automjetet të cilave nuk u është bërë kontrolli i rregullt teknik për më shumë se gjashtë muaj dhe janë parkuar në prona publike ose janë lënë të braktisura. “Ky udhëzim aplikohet edhe në automjetet të cilat nuk mund të identifikohen, nga mungesa e regjistrimit ose numra tjerë identifikues dhe automjetet e aksidentuar të mbetura jashtë përdorimit. Po ashtu Udhëzimi përcakton edhe lokacionin e grumbullit të automjeteve mbeturinë”, thuhet më tej në njoftim. Udhëzimi i ministrit Gashi, po ashtu pamundëson shitjen në treg të automjeteve që përmbajnë plumb, merkur, krom dhe kadmium. Ndërsa komunat e Kosovë, sipas këtij udhëzimi, janë të detyruara që brenda gjashtë muajve, t’i harmonizojnë rregulloret e tyre, ndërsa operatorët ekonomik kanë afat prej tre muajsh të fillojnë zbatimin e dispozitave të këtij udhëzimi.