Në Kosovë nis viti i ri shkollor

Rreth 36 mijë nxënës do të fillojnë mësimin në klasën e parë. Ata do të mësojnë nga abetarja unike

Që nga mëngjesi i ditës së hënë, nëpër të gjitha shkollat, fillore, të mesme dhe  parashkollore të Kosovës filloi viti i ri shkollor. Në bankat shkollore do të ulën mbi 400 mijë nxënës kosovarë, prej tyre rreth 36 mijë do të fillojnë mësimin në klasën e parë, 295 mijë në shkollat fillore dhe rreth 106 mijë në shkollat e mesme.

Mësimdhënësit, pedagogët, nxënësit dhe drejtues të arsimit të Kosovës, përkitazi me këtë ditë i uroi kryeministri Hashim Thaçi dhe ministri i Arsimit, Ramë Buja, duke premtuar kushte sa më të mira për punë dhe mësim.

“Qeveria e Republikës së  Kosovës gjithnjë i ka kushtuar rëndësi të madhe sistemit të arsimit, ngritjes së cilësisë së edukimit dhe përmirësimit të kushteve të punës, si për personelin arsimor ashtu edhe për nxënësit”, thuhet në urimin e kryeministri Hashim Thaçi. Qeveria e Republikës së Kosovës, sipas tij, vazhdon ta ketë prioritet moedernizimin e edukimit, si njërin nga kushtet themelore për zhvillimin e përgjithshëm të shoqërisë, duke e bërë që të rinjtë e Kosovës, sipas kryeministrit, të përgatiten denjësisht për konkurrencën e tregut të vlerave në rajon dhe më gjerë.

Gjithashtu edhe ministri i Arsimit, Shkencës dhe Teknologjisë, Ramë Buja ka uruar të gjithë nxënësit, mësimdhënësit, nxënësit dhe prindërit me rastin e fillimit të vitit të ri shkollor.  “Ne tani po fillojmë vitin e ri shkollor, andaj shfrytëzoj rastin që t’iu them se Ministria e Arsimit, Shkencës dhe Teknologjisë ka bërë të gjitha përgatitjet që ky vit shkollor të jetë me fillim të suksesshëm, vazhdimësi të suksesshme dhe me përfundim të suksesshëm”, thuhet në urimin e ministrit Ramë Buja.