Kosova garanton investitorët zviceranë

Kryeministri Thaçi i ftoi investitorët zviceranë që të investojnë në Kosovë. Ai tha se Kosova krijon mundësi të mirë për investitorët potencialë. Ministri Beqaj ndërkaq ftoi afaristët e haj për privatizimin e PTK-së.

Forumi i biznesit Kosovë-Zvicër ka mbledhur të mërkurën në Prishtinë në hotelin “Swiss Diamond” dhjetëra biznesmenë vendës e të huaj, të cilët kanë shprehur interesim për potencialin ekonomik të Kosovës, reformat e të bërit biznes dhe stabilitetin makrofiskal kosovar.

Të pranishmit në këtë forum, përfshirë 20 afaristë zviceranë, u njoftuan nga kryeministri Hashim Thaçi dhe disa nga ministrat e tij. Vetë Thaçi u ka bërë thirrje investitorëve zviceranë që të investojnë në Kosovë, sepse biznesi i tyre, siç tha ai, është i garantuar.

Thaçi tha se Kosova ofron klimë të përshtatshme për investime në të gjithë sektorët, ndërsa diaspora, sipas tij, është e mirëseardhur.

Kryeministri Hashim Thaçi tha se potenciali ekonomik i Kosovës, reformat në biznes dhe stabiliteti makrofiskal janë garancë për një mjedis afarist stabil dhe të sigurt.

“Arsyet për të investuar në Kosovë janë fuqia punëtore e re, politika e favorshme fiskale, masat preferenciale me BE-në dhe SHBA-në, marrëveshjet për tregti të lirë, siç është CEFTA, resurset natyrore, sidomos ato në fushën e energjetikës dhe të minierave…”, tha kryeministri Thaçi.

Ekonomia e Kosovës, sipas kryeministrit, ka qëndruar shumë e fortë karshi krizës ekonomike ndërkombëtare dhe kjo është edhe një arsye shtesë për të investuar në Kosovë.

Ndërsa, ministri i Bujqësisë, Blerand Stavileci, u fokusua në sektorin e bujqësisë dhe nevojën për investim në këtë sektor. “Pa përkrahjen e deritanishme të shtetit zviceran, e cila veçanërisht në bazamentin zhvillimor të sektorit të hortikulturës ka lënë gjurmë të mëdha, rruga e zhvillimit të sektorit të bujqësisë në përgjithësi do ishte shumë më e mundimshme dhe shumë më e gjatë”, tha ai.

Ministri Stavileci njoftoi edhe për hapat që kjo ministri ka ndërmarrë për krijimin e kushteve sa më të favorshme për investitorët e huaj, që kanë ndikuar në rritjen e bashkëpunimit dhe krijimin e lidhjeve të reja ndërmjet bizneseve kosovare dhe zvicerane, të cilat kanë rezultuar edhe më rritje kryesisht të balancuar të shkëmbimit tregtar në produktet bujqësore.

Për zhvillimin dhe fuqizimin e iniciativave të ndryshme private, ministri Stavileci tregoi se Kosova tashmë ka edhe një listë të gjatë me inpute dhe pajisje bujqësore që janë të liruara prej TVSH-së dhe tarifave doganore.

Në anën tjetër, ambasadorja e Zvicrës në Kosovë, Krystyna Marty Lang, tha se këto dy shtete po e thellojnë bashkëpunimin ekonomik edhe për shkak se ekonomia kosovare po tregon progres të madh karshi krizës ekonomike ndërkombëtare.

“Në tetor të vitit të kaluar Kosova dhe Zvicra kanë nënshkruar marrëveshjen për mbrojtjen dhe promovimin e investimeve. Kjo ofron një ambient të sigurt dhe mundësi për transfer të lirshëm të fondeve brenda dhe jashtë Kosovës”, ka thënë ajo.

Në forumin e biznesit Kosovë-Zvicër kanë marrë pjesë rreth 110 kompani kosovare dhe zvicerane, të cilat po njoftohen për së afërmi me mundësitë e tyre për thellimin e bashkëpunimit ekonomik.

Ndërsa Besim Beqaj, ministër i Ekonomisë, tha se ditët në vijim do të shpallet ftesa për oferta për privatizimin e PTK-së, si dhe ftesa për oferta për ndërtimin e autostradës në drejtim të Shkupit, ka paralajmëruar biznesmenë e huaj.

Ambasadori i Kosovës në Zvicër e vlerësoi lart organizmin e kësaj konference, ndërsa tha se shumica e atyre që kanë ardhur në Kosovë kanë ndarë përshtypje shumë të mira. “Me mendime ndryshe kanë ardhur dhe bazuar edhe në këtë konferencë, por edhe nga ajo që kanë parë në Kosovë, kanë krijuar përshtypje shumë të mira”, tha ambasadori.

Për perspektivën e Kosovës kanë folur edhe bashkëbisedues të tjerë, ndërsa avokati Dastid Pallaska i ka inkurajuar biznesmenët e huaj që të vijnë në Kosovë, sepse ai tha se ligji garanton investimet e tyre.

Ky forum u organizua nga Nisma Ekonomike për Kosovën (ECIKS), Oda Ekonomike e Zvicrës (SEC), e mbështetur nga organizatat partnere, si IPAK, OSEC, ProCredit, Ambasada e Kosovës në Bernë, albinfo.ch dhe Qeveria e Zvicrës.

Foto galeri