Banka Botërore mbështet projektin për vende të reja të punës

Vitin e kaluar Banka Botërore ka financuar projekte në vlerë prej 3 milionë eurosh, ndërsa sivjet kjo shifër do të jetë më e madhe

Banka Botërore do të vazhdojë të mbështesë punësimin e qëndrueshëm në Kosovë. Përfaqësuesit e këtij institucioni këtë e konfirmuan në një takim me Ministrin e punës, Nenad Rashiq në Prishtinë.

　

Në takimin u diskutuan mundësinë e vazhdimit të bashkëpunimit të ndërsjellë edhe për këtë vit në realizimin e shumë projekteve, projekte këto të cilat janë vazhdimësi e vitit të kaluar.

　

“Pasi falënderoi përfaqësuesit e Bankës Botërore për mbështetjen e fuqishme që kanë dhënë në zhvillimin e deritanishëm, sidomos në gjenerimin e punësimit, Rashiq ka nënvizuar rëndësinë e projekteve që përmes ndihmës financiare të dhënë nga Banka Botërore priten të zhvillohen edhe këtë vit si projekte për punësimin, projekte të tjera dedikuar komunave me grante e shumë projekte tjera dhe asistenca të ndryshme varësisht sipas nevojës”, thuhet në komunikatë.

　

Ndërkaq, përfaqësuesit e Bankës Botërore i premtuan ministrit se do vazhdojnë me ndihmën e dhënë edhe për vitin 2012 në të gjitha ato projekte ku ka filluar realizimi i tyre nga vitet e kaluara. Ata thanë se për këtë vit do të jetë një vlerë financiare edhe më e madhe se vitet e kaluar për të gjitha projektet që mbështeten nga Banka Botërore.

　

Programi i mbështetur në strategjinë e punësimit 2010- 2012 tanimë konsiderohet si projekt që ndikon direkt në zbutjen e papunësisë.

　

Ministria e Punës dhe Mirëqenies Sociale do të jetë udhëheqëse e përgjithshme e këtyre programeve dhe përgjegjëse për menaxhimin e plotë të tyre, vlerësimin e projekteve, monitorimin dhe menaxhimin e punës së ekipit punues të këtyre programeve që janë në kuadër të MPMS së.

　

“Përderisa vitin e kaluar Banka Botërore ka financuar projekte në vlerë prej 3 milionë eurosh, sivjet kjo shifër do të jetë më e madhe, me qëllim të zbatimit të të gjitha projekteve për zbutjen e papunësisë”, thuhet në një komunikatë të Ministrisë së Punës dhe Mirëqenies Sociale.

　

---