24.3 milionë euro për Kosovën nga Banka Botërore

Kjo ndihmë vjen si rezultat i vlerësimit pozitiv të gjendjes makro-fiskale të Kosovës, i bërë në koordinim të ngushtë me FMN-në

Ministria e Financave e Kosovës ka bërë të ditur se Banka Botërore ka transferuar këstin e parë për ndihmë direkte buxhetore në vlerë prej 24. 3milionë eurosh.

Kjo ndihmë vjen si rezultat i vlerësimit pozitiv të gjendjes makro-fiskale të Kosovës, i bërë në koordinim të ngushtë me FMN-në, pas përmbushjes së suksesshme të kritereve të përcaktuara me programin e monitoruar nga stafi i FMN-së.

Transferimi i këtij kësti është në harmoni me parashikimet e buxhetit të vitit 2011 dhe në të njëjtën kohë hapë rrugë për transferim të këstit vijues në vlerë prej 35 milionë euro gjatë vitit 2012.

Në njoftimin e Ministrisë së Financave, thuhet se kjo ngjarje dëshmon edhe një herë përkushtimin e Qeverisë për respektimin dhe zbatimin e marrëveshjeve të nënshkruara me Bankën Botërore dhe me Fondin Monetar Ndërkombëtar.