Zvicra, bursa për studentët e dalluar shqiptarë

Këto bursa studimi, sipas Ministrisë së Arsimit, ofrohen në fushat e kërkimit shkencor dhe programeve të studimeve në nivelin Master

Konfederata e Zvicrës ofron bursa studimi për vitin akademik 2012-2013 për studentët shqiptarë që kanë përfunduar studimet universitare me rezultate të shkëlqyera.

Këto bursa studimi, sipas Ministrisë së Arsimit, ofrohen në fushat e kërkimit shkencor dhe programeve të studimeve në nivelin Master, njofton balkanweb dhe ATSH.

 Studimi mundësohet në të gjitha fushat, përveç studimeve në degën e Arteve të Bukura dhe në Muzikë. Periudha e mbulimit të bursës nis në fillim të vitit akademik, nga muaji shtator deri në qershor dhe programet e studimit parashikohen vetëm me kohë të plotë. Aplikantët duhet të jenë nën moshën 35 vjeçare dhe duhet të jenë të pajisur me diplomë për studimet bachelor apo master.

Përveç kësaj, aplikanti duhet të marrë pjesë në një program plotësues ose të arrijë kreditet ECTS, që të përmbushë kërkesat e pranimit në universitet. Mësimdhënia në universitetet zvicerane ofrohet në gjuhët anglisht, frëngjisht, gjermanisht dhe italisht, kjo në varësi të universitetit ku aplikanti dëshiron të studiojë. Në degët inxhinierike dhe të shkencave natyrore, mësimdhënia kryhet vetëm në gjuhën angleze.

Afati i aplikimit është deri më 15 Janar 2012. Aplikimet për bursë studimi duhet të paraqiten në 3 (tri) kopje brenda afatit në Ambasadën Zvicerane në Tiranë. Aplikimi on-line nuk është i pranueshëm. Ai duhet të bëhet në Ambasadën e Zvicrës, ku të interesuarit pajisjen me paketën e aplikimit, pas kontaktit me personat përgjegjës. Paraqitja e kërkesës së studimit bëhet vetëm në një universitet zviceran.