Linja të reja nga Brukseli në Prishtinë dhe Tiranë

Kompania Jetairfly do të fluturojë dy herë në javë, të hënave dhe të premteve për në Prishtinë dhe për në Tiranë

Kompania Jetairfly, e cila në Belgjikë përfaqëson koncernin e madh të turizmit “TUI”, ka hapur dy linja të reja fluturimi nga Brukseli në drejtim të Evropës juglindore.

Kështu aeroplanët e kësaj kompanie do të fluturojnë dy herë në javë, të hënave dhe të premteve për në Prishtinë dhe për në Tiranë. Në të dyja linjat do të fluturojnë aeroplanët Boeing 737-500 me 128 vende për pasagjerë.

Edhe Adria Airways fluturon dy herë në javë nga Brukseli në Prishtinë, ndërsa për në Tiranë, që nga fillimi i vitit realizon fluturime dy herë në javë nga Brukseli po ashtu edhe kompania italiano-shqiptare Belle Air.