Delegatët e 1990-ës priten nga zv.kryeministri Kuçi

Kryetari i atëhershëm i Kuvendit, Ilaz Ramajli tha se njerëzit në pushtet duhet t`ua zgjidhin delegatëve statusin ligjor

Ata të cilët shpallën Kosovën Republikë më 2 korrik 1990, delegatët e Kuvendit të atëhershëm të Kosovës janë pritur nga zëvendëskryeministri i Republikë së Kosovës, Hajredin Kuçi.

Ata shprehën falënderimet e tyre për pritjen që iu bë në shenjë nderimi, por kërkuan që të rregullohet statusi i tyre.

Kryetari i atëhershëm i Kuvendit, Ilaz Ramajli tha se njerëzit të cilët janë në pushtet duhet të zgjidhin kërkesat e kësaj kategorie të shoqërisë duke rregulluar statusin ligjorë e jo material.

Ndërkohë që zëvendëskryeministri Kuçi ka thënë se kërkesat e delegatëve janë të drejta dhe se do të marrin hapa konkret për realizimin e këtyre kërkesave. Pas 21 vjetësh në sallën e Kuvendit, deputetë të atëhershëm thonë të ndjehen krenarë për guximin që patën për të shpallur Kosovën Republikë, me gjithë rrezikun që u kanosej.

Vitin e kaluar 114 delegatë e Kuvendit të Kosovës janë nderuar me “Dekoratën e artë të Pavarësisë”, ndërsa këtë vit qeveria është përkujdesur që tu ndajë monografinë e deklaratës së Pavarësisë së Republikës së Kosovës. Deklarata e 2 Korrikut ishte shpallur para ndërtesës së Kuvendit.