Kriza institucionale rrezikon raportin e progresit

Khaldun: Sfida kryesore e Kosovës është që administrata në Kosovë është e dobët dhe ka nevojë që të forcohet

Ushtruesi i detyrës së shefit të Komisionit Evropian në Kosovë, Khaldoun Sinno e pranon se kriza e stërzgjatur institucionale ka limituar në masë të madhe mundësinë që në Kosovë të ketë një raport pozitiv të Progresit në tetor të këtij viti.

Sinno ka thënë se kushdo që i di zhvillimet, e di edhe se çfarë mund të presim. “Shtetet kanë qeveri dhe kanë administratë. Një nga shtetet anëtare të BE-së vetëm e ka tejkaluar rekordin e të mos mospasurit qeveri, por administrata atje punon. Sfida kryesore e Kosovës, dhe ky është dallimi ndërmjet Kosovës dhe atij shteti anëtar të BE-së, është që administrata në Kosovë është e dobët dhe ka nevojë që të forcohet. Kjo është një nga gjërat që ne e kemi thënë në Raportin e Progresit të vitit të kaluar”, ka deklaruar Sinno.

Gjithashtu ai e ka bërë të qartë se Kosova ka rrezikuar shumë me prishjen e marrëveshjes “Stand By” me FMN-në dhe ka kërkuar që ajo të arrihet sa më shpejt.