Ylli danez Eriksens: Dua të jem si Shaqiri

E krahasojnë me Snijders dhe Bergkamp - dëshiron të luajë si Shaqiri!

Christian Eriksens deri më tash ka luajtur 14 ndeshje për kombëtaren A të vendit të tij. Ndërsa ndeshja e humbur mbrëmë e Danimarkës nga Zvicra, ka qenë e para në skuadrën U21.

Të gjitha shpresat e futbolldashësve danezë ishin mbështetur në Eriksenin që luan për Ajaksin e famshëm, ashtu sikurse ato të zviceranëve në Shaqirin, shkruan Blick.ch.

Por, Eriksen humbi, e moshatari i tij Shaqiri, fitoi. “Jam shumë i zhgënjyer”, thotë ai për gazetën zvicerane dhe vazhdon, duke e lavdëruar rivalin e tij, Shaqirin: “ai, jo vetëm që ka shënuar golin, ai është edhe në përgjithësi i jashtëzakonshëm”.

Një kompliment i tillë ka shumë peshë, shkruan gazeta, kur dihet se Eriksens tashmë në Ajax krahasohet me yje të tillë të mëdhenj si Dennis Bergkamp ose Wesley Snijder.

Eriksens madje shkon edhe më tutje: “Dëshiroj që unë për Danimarkën të jem ashtu sikur është Shaqiri për Zvicrën”! Ai, veç për Shaqirin, fjalë të mira ka thënë edhe për portierin e Zvicrës, Yan Sommer.