Trena testues në tunelin paralel të Simplonit

SBB thotë se punët në shuarjen e plotë do të vazhdojnë deri të hënën

Në njërin nga dy tunelet paralele të Simplonit, që e kishte kapluar zjarri prej tri ditësh, kanë mbetur ende punë deri në shuarjen e plotë.

Megjithatë sot, pas qetësimit të gjendjes, janë lëshuar trenat e parë testues në tunelin paralel, atë që nuk është dëmtuar, por ka pësuar nga tymi i ardhur prej tunelit tjetër.

Vetëm pas rezultateve pozitive të këtij testimi do të vendoset se a do të lejohet qarkullimi i trenave për udhëtarë në tunelin e dytë, ka deklaruar një zëdhënës i ndërmarrjes hekurudhore (SBB).

Sipas tij, temperaturat në vendin ku ka ndodhur zjarri janë ulur dukshëm dhe aktualisht ato janë 30 gradë, njofton drs.ch. Ndërsa gjatë kohës sa vazhdonte zjarri ajo ishte ngritur deri në 800 gradë.

SBB thotë se punët në shuarjen e plotë do të vazhdojnë deri të hënën. Deri më tash për shuarjen janë përdorur një milion litra ujë.

Deri në një vendim tjetër, udhëtarët që marrin këtë rrugë duhet ta kalojnë atë me autobusë, mbi Qafën e Simplonit.

Ende vazhdon të mbetet i paqartë shkaku i zjarrit që kishte shpërthyer të enjten në një tren mallrash që po kalonte në tunelin e SImplonit.