Golat e Nikçit dhe Mehmedit i sigurojnë fitoren FC Zurich-ut

Në ndeshjen FC Luzern-FC Zurich, (0 :5), meritat më të mëdha për fitore u takojnë futbollistëve shqiptarë: Adrian Nikçi dhe Admir Mehmedi

Në super ligën zvicerane në futboll u zhvillua java e parafundit,  e 35-ta me radhë.  Megjithatë, ende nuk dihet se cila nga dy skuadrat e para në renditje do ta fitojë titullin. Java e fundit do të vendosë se a do të jetë kampion FC Baseli apo FC Zurichu.

Në ndeshjen FC Luzern-FC Zurich, në fitoren e thellë të mysafirëve 0 :5 , meritat më të mëdha u takojnë dy futbollistëve shqiptarë: Adrian Nikçi dhe Admir Mehmedi. Nikçi ishte titullar deri në minutën e 83. Ai e filloi serinë e golave duke shënuar në minuten e 31.

Në pjesën e dytë, nga minuta e 61, u aktivizua edhe Admir Mehmedi, i cili me asistimin e Nikçit në minutën e 80 shënoi për rezultatin 0 : 3. Katër minuta më vonë, në minutën e 84-t Mehmedi shënoi edhe golin e tij të dytë te rezultati 0 : 4. 

Me këtë fitore Zurichu ruajti hapin në luftë për titull të kampionit me vetëm një pikë më pak se lideri FC Baseli, i cili këtë javë luajti baraz si mysafir.

Lideri i ligës, FC Baseli si mysafir luajti baraz pa gola kundër FC St. Gallenit.  Për skuadrën e Baselit titullarë ishin 3 futbollistët shqiptarë, Beg Ferati, Granit Xhaka dhe Xherdan Shaqiri. 

Dy të parët luajtën tërë ndeshjen, kurse Shaqiri i cili u ndëshkua me karton të verdhë në minutën e 12,  në lojë qëndroi deri në minuten e 80. Në anën tjetër për vendësit, Kristian Nushi u aktivizua në minutën e 80.

FC Thun shënoi fitore 3 me 1 ndaj FC Bellinzonës ku Milaim Rama ishte asistues në dy golat e parë për vendësit, në minutat  21 dhe 38. Derisa Rama luajti tërë ndeshjen, bashklojtari i tij shqiptar, Muhamed Demiri nuk u aktivizua fare, duke qëndruar në bankinën rezervë.

Skuadra tjetër nga Zurichu, Grasshopper shënoi fitore 2 : 0 në ndeshjen kundër FC Sionit. Në formacionin e skuadrës vendëse, Amir Abrashi u aktivizua tërë ndeshjen kurse Endogan Adili luajti nga minuta e 72.

Në ndeshjen Neuchatel Xamax-Young Bois 1 : 2 nuk luajti asnjë futbollist shqiptar.