Eulex-it i kërkohet transferimi i përgjegjësive te kosovarët

Bajram Rexhepi thotë se nuk e di nëse EULEX-i nuk po do apo nuk po mundet t’i kryejë funksionet edhe në veri

Pas deklarimeve të zëvendëskryeministrit Hajredin Kuçi se ka problem me EULEX-in rreth sundimit të ligjit në veri, vjen edhe një tjetër zë kritik nga qeveria për punën e këtij misioni.

Ky është ministri i Brendshëm, Bajram Rexhepi, i cili ka thënë se problemi me EULEX-in në veri është se ka paqartësi. Sipas tij, në rastet kur EULEX-i nuk mund t’i realizojë përgjegjësitë, ato i transferon tek institucionet e Kosovës.

Rexhepi ka thënë se ende nuk janë të sqaruara këto gjëra me EULEX-in, ndonëse EULEX-i, siç ka thënë ai, është për zbatimin e sundimit të rendit dhe ligjit, përfshirë gjyqësinë, sidomos në veri.

Bajram Rexhepi thotë se nuk e di nëse EULEX-i nuk po do apo nuk po mundet t’i kryejë funksionet edhe në veri. “Nganjëherë më tepër merren me çështje politike, që nuk është mandati i tyre, sesa me misionin teknik për zbatimin e ligjit”, ka thënë Rexhepi.