SD provokon duke përdoron fjalën “Neger”

Prokuroria është duke shqyrtuar në radhët e veta nëse me këtë rast ka shkelje të ligjit kundër racizmit

 Partia e vogël e ekstremit të djathtë “Demokratët e Zvicrës” (SD) ka shpërndarë të martën fletëpalosje në 140 mijë adresa të Cyrihut.

Në këto fletëpalosje ajo ka prezantuar një fjalëkryq, plotësimi i të cilit nxjerr, veç tjerash edhe emërtimin “neger” për zezakët.

Një emërtim i tillë për njerëzit me lëkurë me ngjyrë të mbyllët konsiderohet se është vepër e dënueshme, si shkelje që për baze ka racizmin.

Për këtë arsye autoritetet juridike kanë shprehur interesim për interpretimin e një veprimi të tillë. Por deri më tash ata nuk kanë marrë ndonjë procedurë ndjekjeje.

Sipas zëdhënëse së prokurorisë së lartë të kantonit të Cyrih, Corine Bouvard, prokuroria në fjalë është duke shqyrtuar në radhët e veta nëse me këtë rast ka shkelje të ligjit kundër racizmit . Një shqyrtim të tillë ka kërkuar më parë Komisioni Federal kundër racizmit.

Ndërkaq, në radhët e SD-së, nuk bëhet fjalë për asnjë shkelje. Udhëheqësi i fushatës parazgjedhore të kësaj partie Patric Blöchinger, ka thënë se “ne kemi bërë shqyrtimin juridik të përmbajtjes së fletëpalosjeve që  para zgjedhjeve dhe në to nuk ka asgjë të ndaluar”.