Edhe kryeministri, i bindur se Kosova pranohet në UEFA dhe FIFA

"Kosova do të jetë anëtare e UEFA-s dhe FIFA-s, derisa përfaqësuesja e Kosovës do të paraqitet denjësisht në kualifikimet për Botërorin “Rusia 2018”

Pranimi i Kosovës në UEFA dhe FIFA pritet të ndodhë shumë shpejt. Për këtë është i bindur edhe kryeministri i Kosovës, Isa Mustafa, i cili do të jetë i pranishëm në Kongresin që mbahet në Budapest të Hungarisë më 3 maj.

Ai në një intervistë për gazetën “Zëri” u shpreh se Kosova do të jetë anëtare e UEFA-s dhe FIFA-s, derisa përfaqësuesja e Kosovës do të paraqitet denjësisht në kualifikimet për Botërorin “Rusia 2018”, përcjell albinfo.ch.

Sa i përket sportit të preferuar dhe skuadrave që përkrah në Kosovë dhe jashtë, Mustafa ka përgjigje interesante. “Më duhet të them se më pëlqejnë disa sporte, por mund të veçoj futbollin dhe basketbollin. Sa u përket ekipeve në futbollin vendor kam një lidhje të veçantë emocionale me Flamurtarin e Prishtinës, pasi që të afërm të mi janë themelues të tij.

Ndërkaq, në arenën ndërkombëtare, kam një simpati më të theksuar për ekipet gjermane, e në veçanti për Bayern Munichun. Por, më duhet ta them se pas dominimit të Majlindës dhe paraqitjeve të mira të Norës e të tjerëve, ka filluar të më pëlqejë edhe xhudo. Tashmë kam filluar t’i mësoj edhe disa rregulla të këtij sporti luftarak”, ka thënë Mustafa.