Zvicra bllokon kontot e ish-presidentit tunizian

Micheline Calmy-Rey ka deklaruar se edhe llogaritë e kryetarit të Bregut të Fildishtë, Laurent Gbagbo, duhet të bllokohen urgjentisht

Presidentja e vendit, Micheline Calmy Rey, ka bërë të ditur në një paraqitje për medie se duke filluar nga sot Zvicra ngrin të gjitha llogaritë eventuale bankare që mund t`i ketë në Zvicër kryetari i rrëzuar i Tunizisë, Zine al Abidin Ben Ali.

Po kështu Rey ka deklaruar se edhe llogaritë e kryetarit të Bregut të Fildishtë, Laurent Gbagbo, duhet të bllokohen urgjentisht.

Ajo ka shpallur kështu vendimin që ka marrë sot Qeveria Federale për të bllokuar me veprim të menjëhershëm të hollat e ish-presidentit, por edhe të rrethit të tij. Një vendim i tillë ishte kërkuar këto ditë nga Komisioni për punë të jashtme i Parlamentit zviceran si dhe nga opinioni.