Zviceranët, dëgjues të pasionuar të radios

Në Zvicër, radioja dëgjohet mesatarisht mbi 2 orë në ditë. Transmetuesit publikë vazhdojnë të jenë më të dëgjueshmit dhe më të besueshmit

Një sondazh i bërë lidhur me ndjekjen e medieve nga popullata zvicerane ka konstatuar se 90 për qind e zviceranëve dëgjojnë radion mesatarisht nga dy orë e 12 minuta në ditë.

Në pjesën frankofone dhe italiane të Zvicrës radioja dëgjohet më rrallë dhe më shkurt se në pjesën gjermane, ka konstatuar Publica Data, organizata që ka bërë sondazhin.

Rezultatet e sondazhit tregojnë për një rënie të vogël, gjithsej 1% të dëgjueshmërisë së SRG (grupi i transmetuesve publikë) dhe një ngritje po ashtu të vogël të radiove private.

Megjithëkëtë, SRG dëgjohet nga 66 për qind e zviceranëve të anketuar. Ndërsa marrë veç e veç, e para është radio DRS 1, e cila ka 44% të dëgjuesve.