70 mijë të papunë, pasojë e privatizimit

Pasojat e një procesi të dështuar ekonomik, rreth 700 milionë euro të bllokuara

Përveç disa rasteve të pakta, që dhanë rezultat, shumica e NSH-ve u privatizuan me çmime qesharake, më dyshime për afera korruptive, ndërsa ato ndërmarrje që dikur prodhonin, sot janë bërë depo, kurse toka bujqësore, tokë ndërtimore

Bazuar në opinionet e ekspertëve të ekonomisë, procesi i privatizimit në Kosovë ka shuar mbi 70 mijë vende të punës, si dhe ka lënë të pashfrytëzuara afro 700 milionë euro para të ngrira nga shitja e aseteve të ndërmarrjeve shoqërore të Kosovës. Muhamet Sadiku, profesor universitar, thotë se kjo mënyrë e privatizimit punëtorëve u ka sjellë papunësi, varfëri dhe humbje të shpresës për kohë më të mira.

“Përveç shumë të këqijave që ka sjellë kjo politikë e privatizimit, më e keqja është se paratë nga shitjet ende kujdestarohen nga të huajt, kinse për të pritur kërkesat e kreditorëve”, u shpreh ai. Kosova nëpërmjet këtij procesi ka krijuar fonde rreth 650 – 700 milionë euro, por ato ende mbeten të ngrira. Ndërkohë, sipas Sadikut, metoda e ‘spin-off’-it special ka dështuar tërësisht. “Në përgjithësi privatizimi, në vend që ta forcojë kohezionin social, atë e ka dëmtuar shumë”, th ai për “Kosova Sot”.